Ek shaant si shaam thi, main kamre mein akela tha… mann udaas tha. Snapchat khola — ek ladki ki 3–4 din purani request thi.
Socha, “Chalo accept kar lete hain…”
Accept kiya. Mazak mein apni bhanji ki snap bhej di.
Uska reply aaya — “Nice.”
Aur bas wahi se silsila shuru ho gaya.
Roz baat hone lagi. Main baar-baar poochta, “Kahan se ho?”
Lekin har baar baat ghumaa deti thi.
Mujhe jaanne ki bechaini badhti gayi.
Toh maine khud hi uske baare mein sab pata kar liya —
Kahan rehti hai, kya karti hai.
Par use bataya nahi.
Kyunki kabhi-kabhi, hum kisi ke jhooth se bhi mohabbat kar lete hain…
Sirf isliye kyunki unka hona zaroori lagta hai.
Dheere-dheere, dil judta gaya.
Uski baatein, uski aadatein — sab apni si lagne lagi.
Ek din maine kaha, “Apni photo bhejo.”
Par usne mana kar diya. Baar-baar bolne par bhi nahi bheji.
Tab maine apni ek friend se madad li —
Jo uske college mein padhti thi.
Un dono ki baat karwayi.
Aur ek din… uski tasveer mil gayi.
Us din samajh aaya —
“Main usse sirf baat nahi karta tha… main usse mehsoos karta tha.”
Phir aaye 2nd semester ke exams.
Ek raat humne poori raat baat ki.
Subah usne bola — “Best of luck.”
2 din baad result aaya — ek subject mein fail ho gaya.
Wahi samajh aaya…
“Best of luck kehna asaan hota hai… padhna zaroori hota hai.”
Maine kaha — “Ab mujhse baat mat karna.”
Usne kuch nahi bola… sirf ID deactivate kar di.
Aur chali gayi.
Main toot gaya. Uska ghar mere ghar ke saamne tha…
Par uski jhalak bhi nahi dikhi fir.
2–3 mahine baad, Snapchat pe uski ID fir mili.
Request bheji… usne accept kar li.
Maine kaha —
“Kuch log aate hain, apna banate hain…
Phir bina bye bole chale jaate hain. Jaise tum.”
Usne pucha —
“Kya aapke saath bhi aisa hua hai?”
Main attitude mein tha…
Lekin dil ab bhi ussi ka tha.
3 mahine tak sab normal chala…
Lekin main ab wahi ladka nahi tha.
Ab ek hi maksad tha —
“Usse rulana… jaise main roya tha.”
Ek din kuch samaan mangwaya…
Usne dukaan par rakh diya, khud dene nahi aayi.
Main woh samaan chhorkar wapas aa gaya.
Aur us din woh royi…
Mujhe laga —
“Mera badla poora ho gaya.”
Phir usne mujhe remove kar diya.
230 din ki streak thi… “Best Friends Forever” likha tha.
Sab khatam.
Kabhi add kiya, kabhi ignore kiya.
Main chup raha.
Ek din call karke boli —
“Main aapko remove karti hoon, aur aap puchte bhi nahi kyun?”
Main bas itna bola —
“Wajah toh hogi hi na…”
Smile ki, lekin andar se sab bikhar gaya tha.
Phir WhatsApp pe likha —
“Is baar main tujhe block karunga…”
Bas ek khamoshi reh gayi.
Aur kuch yaadein…
